हिमान्शु शाही कोहलपुर
दैलेख, भैरवी गाउँपालिका-७ गैरासोरुका २७ वर्षीय हेमराज कठायत दुबै मृगौला फेल भएपछि जीवन-मरणको दोसाँधमा छन्। आर्थिक अभावका कारण मृगौला प्रत्यारोपण गर्न नसक्दा उनी अहिले मृत्यु कुर्न बाध्य भएका छन्।
रोजगारीका लागि भारतको सिमलामा मजदुरी गरिरहेका कठायत अचानक बिरामी परे। जाँच गर्दा दुबै मृगौला फेल भएको थाहा भयो। परिवारले उनलाई बचाउन सक्दो प्रयास गर्यो, तर ६ वर्षको उपचारका क्रममा २० लाख रुपैयाँ खर्च भइसक्दा पनि उनको अवस्था सुध्रन सकेको छैन। अहिले उनी कोहलपुर-२, बिकासनगरस्थित दिदी-भिनाजुको घरमा बस्दै उपचार गराइरहेका छन्।
कठायतलाई अहिले हप्तामा ३ पटक डायलासिस गर्नुपर्छ। उनको दिदीले मृगौला दिन तयार भए पनि प्रत्यारोपणका लागि आवश्यक १५ लाख रुपैयाँ अभावले उनको जीवन संकटमा परेको छ। दुई सन्तानका पिता कठायत आर्थिक अभावकै कारण मृत्युलाई कुर्न बाध्य भएको बताउँछन्।
उनको उपचारका लागि आर्थिक सहयोग आवश्यक भएकाले इच्छुक दाताहरूले सक्दो सहयोग गरिदिन परिवारले आग्रह गरेको छ। सहयोग गर्न चाहने व्यक्तिहरूले उहाँको परिवारसँग सम्पर्क गर्न सक्नेछन्।
Leave A Comment