कोहलपुर, २२ चैत्र – कोहलपुर नगरपालिकाले आयोजना गर्ने कोहलपुर नगर स्तरीय फुटबल प्रतियोगिता २०८१ को बारेमा आज पत्रकार सम्मेलन गरी जानकारी दिइएको छ। प्रतियोगिता २२ गतेदेखि ३० गतेसम्म सञ्चालन हुने आयोजकले जानकारी गराएको छ।
पत्रकार सम्मेलनमा कोहलपुर नगरपालिका वडा नं. ८ का वडा अध्यक्ष लाल बहादुर राना प्रमुख अतिथि रहनुभएको थियो भने सभाध्यक्षको भूमिका कोहलपुर नगर खेलकुद संयोजक चक्र चिमाला क्षेत्रीले निर्वाह गर्नुभएको थियो।
प्रतियोगितामा कोहलपुर नगरपालिकाका १५ वडाबाट १५ वटा टिम सहभागी हुनेछन्। प्रतियोगिताका विजेताले निम्न पुरस्कार प्राप्त गर्नेछन्:
प्रथम पुरस्कार: रु ७५,०००
द्वितीय पुरस्कार: रु ३५,०००
प्रतियोगिताको उत्कृष्ट खेलाडीलाई विशेष फुटबल तालिम र छात्रवृत्तिको व्यवस्था गरिने आयोजक समितिले जनाएको छ। प्रतियोगिताका लागि कोहलपुर नगरपालिकाले ४ लाख रुपैयाँ बजेट विनियोजन गरेको छ भने आयोजक समितिले खेलाडीहरूका लागि जर्सी व्यवस्थापन गर्नेछ।
कोहलपुर नगरपालिकाले स्थानीय खेलाडीहरूलाई प्रवर्द्धन गर्ने उद्देश्यले यो प्रतियोगिता आयोजना गरेको हो। प्रतियोगिताले नगरका युवाहरूलाई खेलकुदतर्फ आकर्षित गर्ने र भविष्यमा राष्ट्रिय तथा अन्तर्राष्ट्रिय स्तरका खेलाडी उत्पादन गर्ने लक्ष्य लिएको छ।
Leave A Comment